البوست دا توضيحي لأكتر من حد سألنا عن برنامج الـ SAP و طبيعة استخدامه .. بس عشان نوضح الفكرة هنقولها في مثال صغير على اعتبار انك اول مرة تسمع عنه  :D  

في البدايه أي Business process بتحصل داخل اي شركة .. بتعدي على كذا مرحلة ..

لو هنقول مثلا إن عندك شركة بتبيع product  معين هنفترض إنه مصنع ملابس ..

فجالك عميل لـ sales department  و طلب design أو تصميم معين ..

قسم الـ Sales علشان يقدر يبيع للعميل لازم يعمل check مع الـ inventory علشان يشوف هل المنتج دا موجود في المخزن ولا لأ ..

لو موجود هيسلمه للعميل ولو مش موجود يبدأ قسم الـ Sales يبلغ قسم الـ production planning 

إن في عميل عايز تصميم بالمواصفات دي فيتواصل قسم الانتاج مع المخزن و يعرف ايه الحاجات اللي نقصاه علشان يقدر يصنع التصميم دا .. و بعد ما يجهز التصميم او المنتج اللي محتاجة العميل ..

يبلغ الـ inventory  قسم الـ Sales  ان المنتج جاهز ..

فيتواصل الـ sales Department  مع العميل و يبلغة ان الـ product  موجود و يقدر ييجي يستلمه ..

كل خطوة من اللي حصلت دي لازم بتسمع في قسم الـ Finance أو بمعنى أوضح كل Order حصل للعميل بتطلع على شكل فاتورة .. و بعلم من قسم الحسابات ..

دا كدا شكل  الـ Business process اللي بتحصل علشان تتم اي عملية بيع فـ اي شركة ..

تخيل بقا لو نفس الموضوع دا و نفس الـ process دي تمت في شركة كبيرة  عندها اكتر من 500000 عميل و اكتر من نوع product و ليها ما لا يقل عن 200 - 300 منفذ بيع دا غير حجم الـ stock او

 المخزون اللي عندها .. تفتكر إن شركة بالحجم دا تقدر تُدير كل الكم دا و البيانات دي بالورقة و القلم ؟ او حتى فـ Sheet Excel !! طبعا مستحيل ..

لان الطريقة التقليدية دي ممكن يتم استخدمها عادي في شركة صغيرة مواردها محدوده

و برضو وارد جدا يحصل فيها أخطاء و يحصل تداخل في بيانات العملاء او تأخير في طلب الـ order ..

 فـ تجنبا للاخطاء دي و لتيسير الامور بشكل أسهل لجأت معظم الشركات الكبيرة سواء في مصر او بره مصر .. إنهم يستخدموا Software كبير زي الـ oracle او الـ SAP  بيندرجوا تحت مسمى الـ ERP

كل واحد فيهم مش مجرد software واحد ..

كل واحد فيهم عبارة عن مجموعه من الـ Modules  مُكمليين لبعض عشان يقدروا ياخدوا بيانات من بعض بكل سهولة .. و الـ business process تتم في اسرع وقت و من غير ما يكون في اي خطأ وارد ..

نفهم من كدا إن فكرة الـ ERP إنه Business management Software  اتخلق علشان يُدير الموارد بتاعت اي شركة .. سواء الـ source دي كانت Sales – HR – Inventory – Finance .

و كل عملية منهم بيتم ترجمتها في شكل application و reporting بأستخدام tools  كتيير تقدر تعمل بيها  customize لشكل الـ analyze او الـ report  اللي انت محتاجه ..

دي كدا رؤية عامة عن الـ ERP سواء كان oracle – Sap  أو Microsoft dynamics  ..

و بالتالي نقدر نقول إن الـSAP Fi   هو عباره عن System بيدير العملية الشرائيه و الحسابية بشكل منظم .. دوره انه يقدر بسهولة يعمل Link بين كل قسم و التاني و يعمل integration او تكامل بين كل الـ modules  دي علشان يقدر يفهم الدنيا ماشية أزاي و يحدد إذا كانت الشركة بتكسب ولا بتخسر !! و دا من خلال الـ reports اللي بيعملها باستخدام  الـ SAP ..

كدا نبقا اتكلمنا بشكل مختصر عن طبيعة استخدام الـ SAP و اهم الـ options اللي بتميزه  ..